mohtaram nek dil khush khisal aadmi
ab nazar aate hain khal-khal aadmi

hai yahi daur-e-qaht-ur-rijal aadmi
kab dikhaenge apna kamal aadmi

ja ba ja zalimon ka tasallut hai kyon
aadmi ka hai tujh se sawal aadmi

shad-o-abaad rahne se qasir hain ye
kyon tabahi ke bunte hain jal aadmi

khoi insaniyat se hain mahrum ab
roz karte hain jang-o-jidal aadmi

nafs-e-ammara ne aisa be-his kiya
aadmi ki na ban pae dhaal aadmi

ye sifat mein taghayyur ke asbab hain
kha rahe hain haram-o-halal aadmi

dil ka aaina ab in ka chehra nahin
aap apne hain ab yarghamal aadmi

tha sarokar sidq-o-safa se inhen
aaj karte hain bas qil-o-qal aadmi

ye mere ahd-e-bad-bakht ki baat hai
aadmi ki hi khinche hai khaal aadmi

qabr mein bhi to ghaarat-gar-e-amn hain
kar ke jae kahan intiqal aadmi

sher bhi 'sarfaraaz' us ke hain munfarid
shan ye hai ki hai be-misal aadmi