mue sahte sahte jafa-kariyan
koi hum se sikhe wafadariyan

hamari to guzri isi taur umr
yahi nala karna yahi zariyan

farishta jahan kaam karta na tha
meri aah ne barchhiyan mariyan

gaya jaan se ek jahan le ke shokh
na tujh se gain ye dil-azariyan

kahan tak ye taklif-e-ma la-yutaq
huin muddaton naz-bardariyan

khat-o-kakul-o-zulf-o-andaz-o-naz
huin dam-e-rah sad-giraftariyan

kiya dard-o-gham ne mujhe na-umid
ki majnun ko ye hi thin bimariyan

teri aashnai se hi had hui
bahut ki thin duniya mein hum yariyan

na bhai hamari to qudrat nahin
khinchin 'mir' tujh se hi ye khwariyan