mujh mein asar-e-jalwa-e-mastana hai us ka
itna to kahenge koi diwana hai us ka

kya shan badhi hai sadaf-e-kaun-o-makan ki
nur-e-madani gauhar-e-yak-dana hai us ka

us shama-e-tajalli pe jhuki jati hain aankhen
nazzara jise kahte hain parwana hai us ka

hum shor-e-qayamat ki haqiqat se hain waqif
jo nind udata hai wo afsana hai us ka

aaya hai idhar bich mein nairang-e-tamasha
dekho to udhar kaba o but-khana hai us ka

han rang-e-parida ko yahan kahte hain sahba
jo dil ki shikasta hai wo paimana hai us ka

saqi hai jahan maut wo hai bazm-e-mohabbat
khinchti hai jahan ruh wo mai-khana hai us ka