mujh par junun-e-shauq ka kyun-kar asar ghalat
gar ye ghalat to rah ghalat rahbar ghalat

nazar aa gae wo aap hi dekha jo aaina
samjhe the ishq hi ko mariz-e-nazar ghalat

waraftagi-e-shauq sambhalne bhi de mujhe
be-tabiyon ka wo na kahin len asar ghalat

mat puchh wo nigahon se kya kuchh pila gae
ab be-khudi-e-shauq mein baqi kasar ghalat

'faiq' gudaz-e-dil hai mohabbat mein asl shai
ye sail-e-ashk-e-kham ye daman-e-tar ghalat