mujh pe har ek raaz-e-bahr-o-bar khula
did-e-pas-manzar se har manzar khula

jab samajh aaya mujhe la-taqnatu
kaamrani ka muqaffal dar khula

tha adam ki tah mein hasti ka suragh
mar gae jab uqda mushkil-tar khula

wusat-e-gardun bhi mujh ko kuchh na thi
jab bulandi par mera shah-par khula

haalat-e-dil na chhupai ja saki
raaz-e-pinhan tujh se chashm-e-tar khula

jab bisat-e-dil ulat di waqt ne
tab kahin ja kar wo fitna-gar khula

intizar-e-yar 'naghmi' iztirab
hum ne darwaza rakha shab bhar khula