mujh pe har zulm rawa rakh ki main jo hun so hun
mujh ko apne se juda rakh ki main jo hun so hun

main ki maslub hun de mujh ko bhi zalim ka khitab
sunnat-e-isa jila rakh ki main jo hun so hun

mere ghar mein hai jo ghasib to nikalun ki nahin
mujh pe ilzam-e-jafa rakh ki main jo hun so hun

tere maqtul pe sargarm hain sare munsif
meri lashon ko utha rakh ki main jo hun so hun

garm aahon pe hai ilzam ki hun shoala-nafas
mujh ko phunkon se bujha rakh ki main jo hun so hun

kyun sahifon mein likha hai ki milega insaf
lafz-o-mani na juda rakh ki main jo hun so hun

teri zambil mein har chaal purani hai raqib
mujh ko apnon se lada rakh ki main jo hun so hun

apne wirse se tera qabza hatana hai haris
nam dahshat ki bala rakh ki main jo hun so hun

main ne aankhon mein jala rakha hai aazadi ka tel
mat andheron se dara rakh ki main jo hun so hun

gar mera haq na milega to bigad jaegi baat
apne pahlu se laga rakh ki main jo hun so hun

karbala rakh ke hatheli pe chala hun ghar se
baiat-e-zulm hata rakh ki main jo hun so hun

jab zaminon mein jaden hain to kidhar jaunga
meri shakhen na kata rakh ki main jo hun so hun

adl ki mitti mein ugte nahin dahshat ke babul
apni mitti ko safa rakh ki main jo hun so hun

band aankhon se siyah-ru nazar aaega 'anis'
chashm-e-bina ko khula rakh ki main jo hun so hun