mujh pe koi mehrban hai aaj-kal
ab sukun-e-dil kahan hai aaj-kal

dil mein koi mehman hai aaj-kal
aarzu phir se jawan hai aaj-kal

baat agli si kahan hai aaj-kal
ab takalluf darmiyan hai aaj-kal

tum nahin to lutf-e-aish-e-zist kya
zindagi bar-e-garan hai aaj-kal

jo nazar thi dawat-e-lutf-o-wafa
jaane kyon tir-o-kaman hai aaj kal

aansuon ko zabt kar bhi lun magar
dil to majbur-e-fughan hai aaj-kal

jis jagah sajde kiye the ishq ne
husn nam-dida wahan hai aaj-kal

iltifat-e-husn-o-kaif-e-wasl-e-dost
ek bhuli dastan hai aaj-kal

barq-o-baran sab isi ke waste
kya yahi ek aashiyan hai aaj-kal

hai farishton ka pahunchna bhi muhaal
ek dil-e-nadan jahan hai aaj-kal

raaz-e-dil main ne chhupaya bhi magar
un ki nazron se ayan hai aaj-kal

kar len ab ahl-e-chaman khud intizam
mushkilon mein baghban hai aaj-kal

ek dil-e-pur-soz-e-'mauj' aur bahr-e-ishq
aag pani mein rawan hai aaj-kal