mujhe bakhshi khuda ne kaun rokega zaban meri
tumhein har haal mein sunni padegi dastan meri

kabhi to shahrah-e-zindagi thi kahkashan meri
magar ab karwan mera na gard-e-karwan meri

abhi logon ke dil mein khar ki surat khatakta hun
abhi tak yaad hai ahl-e-chaman ko dastan meri

mere guzre hue tewar abhi bhuli nahin duniya
abhi bikhri hui hain har taraf parchhaiyan meri

meri aankhon mein aansu hain na honton pe tabassum hai
samajh mein kya kisi ke aaegi tarz-e-fughan meri

meri fitrat ko kya samjhenge ye khwab-e-giran wale
sawere ke sitare ki chamak hai raaz-dan meri

teri rah-e-talab mein zakhm sab sine par khae hain
bahaar-e-gulsitan meri hayat-e-jawidan meri