mujhe bhi wahshat-e-sahra pukar main bhi hun
tere visal ka ummid-war main bhi hun

parind kyun meri shakhon se khauf khate hain
ki ek darakht hun aur saya-dar main bhi hun

mujhe bhi hukm mile jaan se guzarne ka
main intizar mein hun shahsawar main bhi hun

bahut se neze yahan khud meri talash mein hain
ye dasht jis mein bara-e-shikar main bhi hun

hawa chale to larazti hai meri lau kitni
main ek charagh hun aur be-qarar main bhi hun