mujhe in aate jate mausamon se dar nahin lagta
nae aur pur-aziyat manzaron se dar nahin lagta

khamoshi ke hain aangan aur sannate ki diwaren
ye kaise log hain jin ko gharon se dar nahin lagta

mujhe is kaghzi kashti pe ek andha bharosa hai
ki tufan mein bhi gahre paniyon se dar nahin lagta

samundar chikhta rahta hai pas-manzar mein aur mujh ko
andhere mein akele sahilon se dar nahin lagta

ye kaise log hain sadiyon ki virani mein rahte hain
inhen kamron ki bosida chhaton se dar nahin lagta

mujhe kuchh aisi aankhen chahiyen apne rafiqon mein
jinhen bebak sachche aainon se dar nahin lagta

mere pichhe kahan aae ho na-malum ki dhun mein
tumhein kya in andhere raston se dar nahin lagta

ye mumkin hai wo un ko maut ki sarhad pe le jaen
parindon ko magar apne paron se dar nahin lagta