mujhe mujh se milati ja rahi hai
faqiri ras aati ja rahi hai

ye mitti mere khal-o-khad chura kar
tera chehra banati ja rahi hai

ye kis ki yaad hai jo mere dil mein
musalle se bichhati ja rahi hai

ajab shai hai sukhan ki sar-bulandi
mere sar ko jhukati ja rahi hai

jo masti raqs mein rakhti thi mujh ko
wo sajdon mein rulati ja rahi hai

lahu bahne laga hai ediyon tak
ibaadat rang lati ja rahi hai