mujhe to jam-o-mai-o-gul ka intizar nahin
main khud bahaar hun mere liye bahaar nahin

huzur-e-ishq agar husn be-qarar nahin
shab-e-firaq koi lutf-e-intizar nahin

ba-qadr-e-zarf diya jam sab ko saqi ne
ye baat wo hai hamein jis ka eatibar nahin

main aap apni hi manzil ka khizr-e-manzil hun
junun mein koi bhi mera sharik-e-kar nahin

hayat-o-maut pe hum tabsire karen kaise
hayat-o-maut pe jab koi ikhtiyar nahin

hujum-o-yas ke aalam mein dard-e-furqat mein
ba-juz tumhaare koi aur raazdar nahin

tilism-e-zist ne kuchh aise gul khilae hain
ki ab nazar mein koi qimat-e-bahaar nahin

jo dard bakhsha hai tum ne usi pe nazan hain
mata-e-zist nahin fikr-e-rozgar nahin