mujhe ye jachte nahin tishna-kaam jate hue
shikoh-e-qasr utha len ghulam jate hue

hawa thami to darichon pe marg phail gai
sukut chhod gaya khush-kalam jate hue

kisi ne aate hue tegh khak par ragdi
kisi ne pani mein phenki niyam jate hue

sukut-yafta wo hont mar dete mujhe
agar wo aankh na karti kalam jate hue

maqam-e-shukr meri raat bach gai us se
jo le uda hai mere subh-sham jate hue