mujh ko hasil jo wasf-e-dua ho gaya
main jidhar chal pada rasta ho gaya

nil mein jab wo utre to kya ho gaya
zoam-e-firaun tuta fana ho gaya

maut kis ki hai kab rizq hai kis qadar
roz-e-awwal hi ye faisla ho gaya

tham lunga main us din inan-e-jahan
mehrban mujh pe jis din khuda ho gaya

ek ek karke mohre sabhi pat gae
un ki bazi ka yun khatma ho gaya

yaad-e-rab aur zikr-e-habib-e-khuda
roz-o-shab ye mera mashghala ho gaya

main jo pahuncha 'habib' apne aaqa ke dar
mujh pe lutf-e-shah-e-do-sara ho gaya