mujh ko saqi ne jo rukhsat kiya mai-khane se
khud mai-e-nab chhalakne lagi paimane se

dekh kar haalat-e-dil un ko taras aa hi gaya
wo bhi ghabra se gae mere tadap jaane se

dete hain tana-e-asnam-parasti mujh ko
sajda karte hue jo nikle hain mai-khane se

aap ke jate hi aabaad hui bazm-e-khayal
ban gai aur bhi taqdir bigad jaane se

mohtasib ab tujhe tauba ka yaqin ho ki na ho
hum to takra chuke paimane ko paimane se

apna ham-maslak o hamraaz kise kahiye 'shakil'
nazar us bazm mein sab aate hain begane se