mujh ko to mashq-e-samaat hai chalo tum bolo
tum ko sunna meri aadat hai chalo tum bolo

main ne khamoshi ko aasan kiya hai khud par
meri barson ki riyazat hai chalo tum bolo

tum se aabaad hai baaton ki tilismi duniya
ye tumhaari bhi zarurat hai chalo tum bolo

hama-tan-gosh zamana hai abhi mauqa hai
tum ko hasil ye suhulat hai chalo tum bolo

hukm goyai ka jab tak na mile 'nusrat' ko
tab talak tum ko ijazat hai chalo tum bolo