mujh se afsurda na ai josh-e-bahaaran hona
kaif mein bhul gaya chaak-gareban hona

jab bikhar jati hai zulf aur nikhar jati hai
mujh ko jamiyat-e-khatir hai pareshan hona

zarra zarra hai tajalli se ladae hue aankh
kis qayamat ki numaish hai ye pinhan hona

dur hain tujh se abhi nur ke zarre har-su
ai meri khak zara aur pareshan hona

hasrat-e-did ne aaina banaya dil ko
ain nazzara hai nazzare ka arman hona

husn har shai ko diya ishq mila har dil ko
taki aasan ho insan ka insan hona

khub hota hai numayan sukhan-e-'natiq' se
misl-e-mani tera har lafz mein pinhan hona