mujh se aisa rabta rakh dosti qaem rahe
pyas yun bujhti rahe ki tishnagi qaem rahe

meri palkon ke tale ab jo diye jalne lage
in diyon ki har tarah se raushni qaem rahe

tujh se milne ki tadap bhi dil se na ho kam kabhi
tu ho mere samne aur be-khudi qaem rahe

meri aankhon mein rahe qaem hujum-e-iltifat
teri aankhon mein sada waraftagi qaem rahe

rang teri zindagi mein har taraf bikhre rahen
tu hai meri zindagi ye zindagi qaem rahe

tujh se meri guftugu hai aarzu ka silsila
phul mahke hain to in ki tazgi qaem rahe