mujh se ek ek qadam par bichhadta hua kaun tha
sath mere mujhe kya khabar dusra kaun tha

ta-ba-manzil ye bikhri hui gard-e-pa kis ki hai
ai barabar qadam dosto wo juda kaun tha

jaane kis khatre ne bakhsh di sab ko ham-saegi
warna ek dusre se yahan aashna kaun tha

pahle kis ki nazar mein khazane the us par ke
misl mere hadon se udhar dekhta kaun tha

kaun tha mausam-e-saf bhi jis ko aaya na ras
kuchh to hum se kaho wo halak-e-hawa kaun tha

kaun tha mere par taulne par nazar jis ki thi
jis ne sar par mere aasman rakh diya kaun tha

kis ki bhigi sada jhankti thi meri khak se
main tha apna khandar is mein mere siwa kaun tha

kaun tha qail-e-qahr hona tha jis ko abhi
tut kar jis pe barsi bhayanak ghata kaun tha