mukhalifon ke jilau mein wo aaj shamil tha
wafa-parast ruton ka jo shakhs hasil tha

wo meri zat ki pahchan bhi taaruf bhi
mere lahu mein ba-rang-e-hayat shamil tha

hasin raat thi hathon mein hath the hum the
kanar-e-ab khamoshi thi mah-e-kaamil tha

taghayyuraat-e-zamana bhi kya ajab shai hain
jo jaan-nisar tha pahle wo aaj qatil tha

mujhe bhi faqr ki daulat pe fakhr tha yaro
use bhi lal-o-guhar ka ghurur hasil tha

bahut hi sada tabiat tha un dinon 'arshad'
ki jab wo mehr-o-khulus-o-wafa ka qail tha