muntazir hun main apne aazar ka
lena hai intiqam thokar ka

na-khudaon ki niyyaton ki qasam
hai bharosa to bas samundar ka

kaun fitrat se baz aata hai
waswasa thik tha kabutar ka

in palatte hue bagulon se
puchhiyo kya bana mere ghar ka

har tirahe pe ek khuda hai jahan
main wahan aadmi hun be-sar ka

ek mahtab ke tawaf mein tha
har sitara mere muqaddar ka

ek aansu jo tum pe war gae
marsiya tha wo dida-e-tar ka