musafirat meri har justuju se khali hai
bas ek madar mein phirne ki khu bana li hai

tamam waqt main shahr-e-guman mein rahta hun
sukun se rahne ki mantiq nai nikali hai

haris aariyon ki bhent chadh gaya chup-chap
shajar pe ab koi patta na koi dali hai

hawa mein bhar gai hai bu-e-ishtiha har su
kisi gharib ne apni rida uchhaali hai

labon pe chashni aur dil mein nafraton ka zahr
ye aab-o-nar ki sangat badi nirali hai

bata raha hai ye patton ka matami sa shor
chaman se jald hi aandhi guzarne wali hai