mushkil hai ki pahlu se juda dil nahin hota
aur mere satane se wo ghafil nahin hota

parde mein agar us ke mera dil nahin hota
aaina rukh-e-yar ke qabil nahin hota

jab qasd musammam hai to har kar hai aasan
jo kaam ki mushkil hai wo mushkil nahin hota

gar parda-nashini tujhe manzur thi dilbar
dil mera tere waste mahmil nahin hota

mai-khana ko jata hun ye takrar abas hai
naseh to kisi taur se qail nahin hota

saffak kaha main unhen hans ke wo bole
har sahab-e-shamshir to qatil nahin hota

didar-talab ka talib hai use jalwa dikha de
aashiq tu zar-o-mal ka sail nahin hota

wo nur-e-mubin jo ki tajalli-e-laqa hai
us ka ba-juz aadam koi hamil nahin hota

mera to pata khak bhi rahta na 'jamila'
gar fazl-e-ilahi mere shamil nahin hota