na aasman mein zamin mein na kaenat mein hai
wo husn jo ki azal hi se teri zat mein hai

ye rang-o-nur ye khushbu ye mauj-ha-e-bahaar
masarraton ka khazana rah-e-hayat mein hai

chhupa na paega koi bhi mujh se raaz-e-hayat
ki aaina gham-e-dauran ka mere hath mein hai

jo rag sirf tha mahdud meri zat talak
wo ban ke ek tarana sa kaenat mein hai

zamin-bos abhi hoga fikr-o-fan ka mahal
ek intishaar sa duniya-e-be-sabaat mein hai

ye aadmi ka hai jangal zara sanbhal ke chalo
yahan to nag hawas ka tumhaari ghat mein hai

badal hi jaegi 'jami' tumhaari tarz-e-kalam
ek inqalab ki khushbu tumhaari baat mein hai