na bap man se na baji chachi chacha se gharaz
gharaz hai apni to us be-gharaz khuda se gharaz

nigode mardon ko landan ki sair bhai hai
na un ko kabe se matlab na kalka se gharaz

na zindagi ko main jaanun na maut ko jaanun
na ibtida se gharaz hai na intiha se gharaz

khuda ko kaam hai bandon ki aazmaish se
namaz roze se matlab na iltija se gharaz

khasam chhuda kisi bhadwe ka munh nahin dekha
haya ko kaam hai hum se hamein haya se gharaz

hua hai bibiyo paida wali ke ghar shaitan
rasul se jise matlab na kuchh khuda se gharaz

ye taj ke baithi hain 'shaida' pe din duniya ko
khasam se kaam hai in ko na aashna se gharaz