na din pahad lage ab na raat bhaari lage
na aae nind to aaankhon ko kya khumari lage

khushi nahin thi to gham se nibah kar lete
kisi ke sath tabiat magar hamari lage

koi na ho kabhi ahbab ke karam ka shikar
meri tarah na kisi dil pe zakhm-e-kari lage

hamein tadapta hua gham mein chhodne wale
khuda kare ki tujhe zindagi hamari lage

nafas nafas hamein roz-e-jaza se badh kar hai
wo shauq se jiye jis ko hayat pyari lage

wo mar na jae to phir aur kya kare ai 'shakeb'
wajud apna jise zindagi pe bhaari lage