na hua mail-e-wafa na hua
mera matlab kabhi ada na hua

naza mein un ka samna na hua
ye bhi achchha hua bura na hua

munh pe dale naqab aae hain
hashr mein bhi to samna na hua

nawak-e-yar hi raha hamdam
dil se mere kabhi juda na hua

bad-nasibi ki ai dil-e-betab
tu hi ek laeq-e-saza na hua

un ki taskin se aur badhna tha
dard-e-dil tham gaya siwa na hua

dur-andesh hai bahut naseh
kitna chheda magar khafa na hua

jama aghyar to hain mahfil mein
mera kya main hua hua na hua

mar-mita jin ke ishq mein 'sayyaf'
wada un ka kabhi wafa na hua