nala nahin ki aah nahin ya buka nahin
hum ne shab-e-firaq mein kya kya kiya nahin

wo dard-e-la-dawa mujhe bakhsha hai ishq ne
bachne ki kuchh umid nahin aasra nahin

kya kar rahe ho chaaragaro pas se hato
ab hai dua ka waqt ye waqt-e-dawa nahin

aa jaen waqt-e-naza to main un ko dekh lun
arman koi dil mein ab is ke siwa nahin

'sayyaf' kya bataen ki dil ka hai haal kya
muddat se ab to pahlu mein us ka pata nahin