na itrao chaman walon hasin phulon ke joban par
raha karti hai rangini faqat do roz gulshan par

kahan mumkin ki rah jata koi tinka gulistan mein
hazaron bijliyan girti rahin mere nasheman par

jo aankhon mein rahe wo be-shubah hai be-baha gauhar
wo aansu kya hai jo aa jae chashm-e-tar se daman par

sata le jitna ji chahe jala le jitna ji chahe
tujhe rona padega aa ke ek din mere madfan par

kami to kuchh na thi 'paikan' mere shauq-e-shahadat mein
na jaane tegh-e-qatil kyon chali ruk ruk ke gardan par