na karb-e-hijr na kaiffiyat-e-visal mein hun
mujhe na chhediye ab main ajib haal mein hun

tamam rang-e-ibarat mein soz-e-jaan se mere
main husn-e-zat hun aur manzil-e-jamal mein hun

mera wajud zarurat hai har zamane ki
main raushni ki tarah zehn-e-mah-o-sal mein hun

abhi wasil-e-izhaar dhundhti hai nigah
abhi sawal kahan hasrat-e-sawal mein hun

mujhe na dekh meri zat se alag kar ke
main jo bhi kuchh hun faqat apne khadd-o-khal mein hun

main ji raha hun ye mera kamal hai 'hashri'
main apne ahd ki tahzib ke zawal mein hun