na khun-e-dil hai na mai ka khumar aankhon mein
basi hui hai tumhaari bahaar aankhon mein

phiri hain putliyan begana-war aankhon mein
chhupa hua hai koi parda-dar aankhon mein

ummid-e-jalwa-e-didar baad-e-marg kahan
bhari hai yas ne khak-e-mazar aankhon mein

diye baghair tere bagh mein gulon ne dagh
chubhoe nargis-e-shahla ne khar aankhon mein

ilahi dida-e-hairan khula na rah jae
thahar na jae kahin intizar aankhon mein

wo rone wala hun 'shola' ki baad-e-marg mera
banaen mardum-e-dida-e-mazar aankhon mein