na koi dost na dushman ajib duniya hai
ye zindagi hai ki tanhaiyon ka sahra hai

badalte rahte hain har mod par safar ke rafiq
gham-e-hayat magar sath sath chalta hai

ye shahr-e-dard hai logon sambhal sambhal ke chalo
har ek zarre mein aabaad dil ki duniya hai

banega ye naya aasman-e-fikr-o-nazar
ghubar-e-rah jo pamal ho ke uttha hai

jo dekhiye to bagula hai reg-e-awara
jo sochiye to yahi aabru-e-sahra hai

kuchh aaj rang hai maila faza ke aanchal ka
zarur aadam-e-khaki idhar se guzra hai

'sarosh' wadi-e-ghurbat se be-khabar guzro
tumhaare sath mohabbat ka narm saya hai