na koi marhala dushwar hoga
junun jab qafila salar hoga

shafaq ye rang laegi sahar tak
ki khun-alud har akhbar hoga

rahega jo bhi muflis ahd-e-nau mein
yaqinan sahab-e-kirdar hoga

ye ghar ko dekh kar main sochta hun
kisi din mujh pe ye ghar bar hoga

tashaddud karne wale ye bhi sochen
ki ek din sab se istifsar hoga

masaib se hi jab fursat na hogi
to kab zikr-e-lab-o-rukhsar hoga

na jage log to ye soch le phir
'sharar' jalna tera be-kar hoga