na mal-o-zar hai na saghar na baada rakhte hain
ho koi haal magar dil kushada rakhte hain

mile hain ranj bahut phir bhi hain umid se kam
hum is jahan se tawaqqo ziyaada rakhte hain

badhae hath koi dost ho ki dushman ho
hum ahl-e-ishq hain daman kushada rakhte hain

hamare ishq mein rang-e-hawas ko dakhl nahin
mizaj-e-ishq azal hi se sada rakhte hain

gham-e-jahan se kabhi kam hui na masti-e-zist
hanuz nashsha-e-hasti ziyaada rakhte hain

na tang-dil hain na kam-hausla na tang-nazar
dil-o-nigah hamesha kushada rakhte hain

payam-e-zist pe mitna unhin ko aata hai
jo zindagi se mohabbat ziyaada rakhte hain