na mana mera kahna dil gaya kyun dad-khwahi ko
saza dete hain wan mujrim bana kar be-gunahi ko

hamari be-kasi ne chhan dala hai jahan sara
siwa tere thikana hi nahin hai be-panahi ko

qayamat mein wo mujh ko dekh kar kahte hain ghairon se
khuda ki shan hai aashiq chale hain dad-khwahi ko

udai khak us ki khub ja kar koh-o-sahra mein
dil-e-wahshi ne kya ulte diye chakkar tabahi ko

ujad jaega jis din karkhana baada-khwaron ka
bahut roega saqi kashti-e-mai ki tabahi ko

bura ho rashk ka rahbar samajh kar dil se jo puchha
adam ka rasta batla diya gum-gashta-rahi ko