na sang-e-rah na sadd-e-quyud ki surat
main dah raha hun ab apne wajud ki surat

jagah pe apni jama hai wo sang ki manind
bikhar raha hun main diwar-e-dud ki surat

jabin pe khak-e-taqaddus hun mujh ko pahchano
chamak raha hun main naqsh-e-sujud ki surat

meri nazar mein tayaqqun ki dhup raushan ho
kabhi to phaile wo rang-e-shuhud ki surat

guzashta sadiyon ka bhi bojh mujh ko dhona tha
ada hua hun main har lamha sud ki surat

laraz raha hun main apni jasaraton par 'sham'
wo sahma sahma khada hai jumud ki surat