na sare aib hain aib aur hunar hunar bhi nahin
kuchh ehtiyat to kije par is qadar bhi nahin

tumhaare hijr mein bandha hai wo saman hum ne
ki aankh hum se milata hai nauhagar bhi nahin

nahin zara bhi to us ne nahin milaya rukh
main us ko dekh raha tha ye jaan kar bhi nahin

ye hum ne bhul ki aa pahunche un ki mahfil mein
par un se arz-e-tamanna to bhul kar bhi nahin

koi to rang bikheregi zindagi ki ye dhup
agar tawil nahin hai to mukhtasar bhi nahin

bhala main kaise ise dost man lun 'farhat'
jo ahl-e-zulm nahin aur chaaragar bhi nahin