na shahr mein na kisi dasht-e-hu mein khak hue
hamare khwab hamare lahu mein khak hue

kisi ke hath laga kab wo mahtab-badan
kai jiyale wahin justuju mein khak hue

dhuan sa uthta hai dil se jo sochta hun kabhi
wo kaun the jo meri aarzu mein khak hue

the kitne git jo aawaz ko taraste rahe
hazar rag rag-e-khush-gulu mein khak hue

ab is se achchha-bhala ikhtitam kya hota
uthe the main se magar ja ke tu mein khak hue