na shart koi hai apni na koi sauda hai
hamare sath agar tum chalo to achchha hai

lagi hai aag kahin ya charagh jalte hain
yahan se dur jo dekhen to kuchh ujala hai

hamare haal pe aansu hain us ki aankhon mein
magar khayal sa hota hai ye bhi dhoka hai

gaya to sadma nahin tha guman bhi tod gaya
hamein guman yahi tha ki wo hamara hai

bichhad ke tujh se nahin hum ko ranj-e-tanhai
hamare sath to ab wahshaton ka mela hai

agar mile to kabhi us se puchhna 'adil'
hamein batao koi yaad tum ko aata hai