na tarz-e-khas na andaz-e-gul-fishan le kar
pukarta hun main tujh ko teri zaban le kar

tamam husn-e-tamanna dhuan dhuan le kar
nigah bujh hi gai raat ka saman le kar

meri bahaar-e-tamanna ko jawedan kar de
main kya karunga bhala umr-e-raegan le kar

tumhaare bazm ka dastur chahe jo bhi ho
tumhaari bazm mein aaya hun main zaban le kar

ab aur kitna tamasha banaegi qismat
phirun main apna janaza kahan kahan le kar

mujhe hi ras na aai ye bad-nasib zaban
to kya karoge miyan tum meri zaban le kar

ye pastiyon ki lakiren na chhu sakengi mujhe
main ghar se nikla hun aankhon mein aasman le kar

suhag jis ki judai mein ujda ujda hai
kabhi to lautega sone ki chudiyan le kar

tumhaara aaina kaise na ehtiram kare
meri ghazal bhi to aai hai kahkashan le kar

khirad ki resham-o-atlas-nawaz mahfil mein
junun chala hai gareban ki dhajjiyan le kar

mizaj bachchon ke jaisa hai ab bhi 'qaisar' ka
bahut hi khush hai wo kaghaz ki titliyan le kar