na toko dosto us ki bahaar nam-e-khuda
yahi ab ek hai yan gul-ezar nam-e-khuda

ye wo sanam hai pari-ru ki jis pe hoti thin
hazar jaan se pariyan nisar nam-e-khuda

usi sanam ki nigahon ki barchhiyan yaro
hui hain mere kaleje ke par nam-e-khuda

usi ke nashtar-e-mizhgan mein ab wo tezi hai
ki jis se hote hain hum dil-figar nam-e-khuda

usi sanam ke rukh o zulf ke tasawwur mein
hamari guzre hai lail-o-nahaar nam-e-khuda

gali mein kucha o bazar mein hum ab din raat
usi ke waste phirte hain khwar nam-e-khuda

usi ke sar ki qasam hai ki hum to mar jate
agar na hota ye gul-ru nigar nam-e-khuda

bane hain yan jo kai dair aur sanam-khane
udhar jo jo hota hai us ka guzar nam-e-khuda

utha ke sina jhatak bazu aur bana kar dhaj
chale hai jis ghadi thokar ko mar nam-e-khuda

qadam qadam pe barahman kahen hain bismillah
sanam bhi kahte hain sab bar bar nam-e-khuda

gharaz jidhar ko nikalta hai ye to har ek ke
zaban se nikle hai be-ikhtiyar nam-e-khuda

'nazir' ek ghazal aur kah ki tere sukhan
hain ab to sab guhar-e-ab-dar nam-e-khuda