na wo tum ho na wo masihai
yunhi socha to aankh bhar aai

ab wo pahli si raunaqen bhi nahin
na wo pahli si hai chaman-arai

waqt-e-piri hai hu ka aalam hai
su-e-mahshar chali hai tanhai

dil-e-pur-khun ki ye numaish hai
nau-ba-nau yun bahaar hai aai

kyon teri yaad bhi nahin aati
gham-e-jaanan hai tu bhi harjai

kaise kaise guzar gae mausam
dil se jati rahi shakebai

kyon mere shahr aa gae ho tum
kya zaruri hai ab bhi ruswai

bas karo ab wazahaten 'barham'
us se achchhi nahin shanasai