nadi pahad ghane jangalon mein charcha tha
wo be-gunah shajar be-libas kitna tha

mili thi shakh-e-samar nur-e-jism-o-jaan ke liye
jise wo hath laga kar bujha bujha sa tha

tamam umr dil-o-jaan muraqabe mein rahe
latif-tar lab-o-rukhsar ka wazifa tha

kuchh is tarah saf-e-sayyargan hui barham
phir is ke baad na suraj tha aur na saya tha

jahan pe khak-e-bayaban khiram karti hai
wahan pe takiya-e-mahtab tha daricha tha

nai shariat-e-jamhur basne wali thi
nae ufuq se wo 'khurshid' ugne wala tha