nae makan mein aqide ki koi ja hi nahin
khuda to hai pa kahin banda-e-khuda hi nahin

bharosa yun to bahut tha magar dua ke liye
jo hath hum ne uthaya to wo utha hi nahin

har ek shakhs yahan apne-ap mein gum hai
kisi se hath milane ka faeda hi nahin

lahu-luhan hai jo bhi udhar se aaya hai
magar ye main ki jo us rah tak gaya hi nahin

dayar-e-khwab hai aao yahin qayam karen
yahan se yun bhi nikalne ka rasta hi nahin