nakaamiyon pe sar-ba-gareban nahin hun main
jo uth ke baith jae wo tufan nahin hun main

kya khak-e-dil ki aag jo shoala na de sake
jazbaat-e-mushtail se pasheman nahin hun main

ho mujh se aadmi ki khushamad khuda ki shan
jis ka ho ye shiar wo insan nahin hun main

meri shaguftagi ka bhi aaega ek waqt
mahke na jo kabhi wo gulistan nahin hun main

kat kat ke gir raha hai 'munawar' jigar mera
bazm-e-sukhan mein aaj ghazal-khwan nahin hun main