nae mani nae uslub likhna
ghazal ko chand ka mahbub likhna

shuur-e-zindagi anqa hai lekin
safar ke zaiqe marghub likhna

hamari fikr par kohre sajaana
mataa-e-zehn ko maslub likhna

jahan zulmat ke pahre har qadam hon
hamare shahr se mansub likhna

pilana zahr paimane badal kar
darun-e-mai-kada mashrub likhna

tum apne ru-ba-ru aaina rakh ke
kisi hamsae ko majzub likhna

tera lahja hai 'nashtar' ehtajaji
paron par titliyon ke khub likhna