nae uslub mein zinda hue hain
tabhi to harf-e-ainda hue hain

tulu-e-subh ki ummid kam thi
dua-e-shab se tabinda hue hain

na kaam aaya jahan arz-e-hunar bhi
lab-e-izhaar sharminda hue hain

badan mein jite ji jo mar gae the
wo apni ruh mein zinda hue hain

hamari shoalagi sab se juda hai
bujhe hain hum to sozinda hue hain

mita sakta nahin jin ko zamana
kuchh aise naqsh-e-painda hue hain

hamein sud-o-ziyan se kya 'sukhan' hum
na yabinda na girinda hue hain