nafi ke jabr se aazad aur sabaat se dur
hai kaenat koi meri kaenat se dur

mera wajud meri dastan ka hissa hai
mera nishan hai kahin par hisar-e-zat se dur

pata chala hai ki chashma hai aab-e-haiwan ka
zamin ki had se pare arsa-e-hayat se dur

nigar khane ke andar nigar khane hain
kai khayal hain mere takhaiyyulat se dur

ye sabz rang ye shakhen to hain nazar ka fareb
uga hua hai shajar dal aur pat se dur