naghma-e-ishq sunata hun main is shan ke sath
raqs karta hai zamana mere wijdan ke sath

hai mera zauq-e-junun kufr-o-khirad ki zad mein
ai khuda ab to utha le mujhe iman ke sath

dil bana dost to kya kya na sitam us ne kiye
hum bhi nadan the nibhate rahe nadan ke sath

dagh mathe pe chale shaikh-o-barahman le kar
aae the dair-o-haram tak bade arman ke sath

gham-e-jaanan gham-e-hasti gham-e-haalat 'shakil'
kya kahun kitni balaen hain meri jaan ke sath