nahin khayal to phir intizar kis ka hai
ye zehn-o-dil ye bila-wajh bar kis ka hai

batae kaun ye ahl-e-khirad se mahfil mein
chaman hai kis ke liye khar-zar kis ka hai

hamara nam to ghairon mein ho gaya shamil
jo log apne hain un mein shumar kis ka hai

kisi ko daulat-e-duniya kisi ko izzat-e-nafs
khuda ki den pe ab ikhtiyar kis ka hai

urus-e-maut se jaldi hai kis ko milne ki
qadam badha hua ye su-e-dar kis ka hai

farishte aa ke 'wasiyya' se bole marqad mein
lahad mein aap ko ab intizar kis ka hai